Uprümen up Bonnen

In einer Kisten würn Hochtiedszeitungen. Do wurd in Versen beschrieben, wie seck dat Poar kenneeliert hätt. De Öllern und Gäste kreegen ok ühren Vers av. Et kamm ok vär, dat wecke ´n scheivet Gesichte maket hätt, wenn se ühren Vers hüren. Bie´n dürkieken moßte eck fastestellen, dat einige gor nicht mier tohope sind un jeder siener Wege gaht.

Ganz ole sülmst gekakete Seepe kamm ok noch an den Dag. Eck weit noch ut miener Kindhoat, wu dat Kaken van der Seepe vär seck ging. Alles ole Fett kamm in´n iesernen Pott, denn kamm do wat bie, eck glöbe, et was Ätznatron. Dat wurd tohope uppekaket un rook innen ganzen Huse. Wenn den affekühlt was, harre seck babenuppe de Seepe affesettet. Ünnen innen Potte was saun Glibberkram, dormie schruppen wie de Steine värn Huse.

Inmakegläser stunnen ok noch in einer Ecke. Sau Twei-Liter-Gläser bruket vandage ok kein Hushalt miehr. Ut groten Gläsern, freuher taun Inmaken van Gurken, würn nu Blaumenvasen. Witte un greune Wienballons staht do ok noch rümme. Ob de innen Kriege vär Upgesetteten oder Sülmsgebrennten würn, weit eck nich.

Twee-Zentner-Linnensäcke sind ok noch do. De keimen freuher vull Kurn mit up`n Brutwagen. Innen bewesten Deil vannen Sacke staht: „Unsere Aussaat segne Gott“, un ünnen staht de Name, wu hei oder sei herkamm un in wecken Joahr de Hochtied was. Blaumen un Blärranken sind ümme den Namen ümmerümme. Bie einigen hänget sei innen Treppenhuse oder inner Deele anner Wand.

In einen Kasten leigen noch Kinoprogramme. Wenn man in den 50-er Joahren Sönndages in´t Kino wolle, moßte man verher Koarten bestellen, süß kreeg man keinen Platz, sau grot was de Andrang. Denn wurd ok ein Programm ekofft. Wat fäll mie do inne Hänne? „Grün ist die Heide“ mit Sonja Ziemann un Rudolf Prack. „Das Wirtshaus im Spessart“ mit Liselotte Pulver un Carlos Thompson und „Teufel in Seide“ mit Lilli Palmer un Curd Jürgens un viele annere.