Mit Test un Snutendook

Bi all de Corona Verordnungen op de Eer, de sik dorto noch alle poor Doge ännern köönt, weet en doch gor nich, wat he mögen noch dröff off nich.

Bi dat Antrecken geiht dat al los. Eerst över sienen langen Boort eene Maske antüdeln, wo doch sowieso unnen un boben noch Luft rutgeiht. Un wo sücht dat överhaupt ut? Dor geiht doch de ganze Autorität van de Wiehnachtsmann innen Mors!

Un wat mutt he sünst noch allens bedenken! Op jeden Fall mutt he een groden Buddel Desinfektionsmiddel mitnehmen. So kort för Wienachten droff he sik doch nich noch jichenswo ansticken un krank weern.

Denn bruukt he ok noch unbedingt enn gültigen Corona-Impfpass. Ober wo schall he denn nu so flink noch herkriegen?

Un fukeln draff ok de Wiehnachtsmann nich. Wat schall dor von weern, wenn he nu överall stünnenlang to´n Testen anstohn un sik inne Neese pulen loten mutt? Dat köst em massig Tied.

Dorbi wart em de Tiet so of so noch to kort. Wo he nu doch all de Bipackzeddel schrieben mutt, womit he de Kinner verklokfideln mutt, wat se dütt Johr dat Speeltüüchauto un de elektrische Isenbohn sülben schuben möt.

Ok veele annre Soken goht nich, wiel dor binnen de lüttjen Chips fehlt, de nich rechtiedig levert wurrn sind. Dütt kummt, wiel dat allens von von ganz wiet weg herföhrt weern mutt.

Villicht hohlt he jo un beten Tiet wedder op, wiel he de Geschenke dütt mol eenfach vör de Döör stellt. Von Huus to Huus överall ringohn is jo bi Corona nich verlöövt.

Ober wie schall he denn nu rutkriegen, of de Kinner denn ok ortig wesen sünd un he mit siene Pietschen drauen mutt? Ok mochen sicher veele Kinner den Wiehnachtsmann mol richtig to sehn kriegen.

Bliff em woll nix anners över, as buten an dat Fenster to kloppen. Hoffentlich klappt dat denn ok mit de Verständigung wegen dat dösige Snutendook. Wi willt dat Beste hoffen. Na, denn man frohe Wiehnachten!!