Landeier

Du markst aber ok, wo „stressig“ dat dor is mit de väälen Minschen un den Grootstadt-Verkehr. Egaalwech musst du in Tie´n von Corona uppassen, dat di keen Minsch to dicht kummt! Dat is gor nich so eenfach! Am Enn büst du froh, wenn du wedder to Huus büst, wo du Platz hest.

Aber egaal: In November besöchen wi all tauhopen uuse öllste Dochter in Hamborg, denn se har Geburtsdach. Eegentlich wollen wi mit de ganze Familje in´t Museum gahn. Aber dat güng jo nu nich wägen Corona. Dorüm sünd wi spaziern gahn un hebbt dor buten Kooken äten un Kaffee drunken. Uuse Kinner wöörn bannich gaut stellt un leuten sick den Geburtsdach ok von den ullen Virus nich verdarben.

Se harn sick länger nich seihn. Egaalwech wöörn se an Sabbeln un an Gnickern. Mien Jung vertell von siene Utbildung, ok wenn se intaach gor nich in de Uni gahn könn, sonnern to Huus an ehrn Bildscheerm sitten un von dor ut allens bearbeiden möss.

Wi Öllern freien us, dat sick de beiden so vääl to vertellen harn. Süms in de Stratenbahn güng jüm de „Schnackstoff“ nich ut, ok wenn de annern in de Bahn all blooß vör sick henstiern, mit ehr Handy rümspälen un dor up rümtippen dään. Oder bi´n Telefoniern luue vör sick henschnacken un ut´n Fenster kieken dään.

Sienen Naaber oder sien Gegenöber keik jedenfalls keen Minsch an. Un ick glööv, dat is ok nich anners, wenn KEEN Corona is! Aber mit ehre Masken versteiken sick de Lüüe nu noch mehr. In düsse Grootstadt-Anonymität scheert sick eenfach keen Minsch dorüm, wat du maakst: ob du dööst, släppst oder för di hensummst, ob du weenst oder grienst, ob du Angst hest oder di freist. Ob du Englisch, Französich, Arabisch oder eene afrikanische Spraak vör di henbrabbelst. In de Bahn is de Minschen schienbor allens schietegaal!

Doch up eenmal keiken glieks mehrere Mitfohrers na us her. Na, nu güng jüm dat Gesabbel von uuse Kinner woll doch so langsam up de Nerven? De stünnen näbenenanner in den Gang un schnacken jümmer noch luue mitenanner, as ob se sick ganz „as to Huus“ feuhlen, un lachen sick scheckig.

Du könnst an de Oogen von de annern affläsen, dat se mithörn dään un an Grübeln wöörn. Dat möss jo woll bannich intressant wään, wat de beiden dor schnacken dään!!? Un upmal föll mi up, worüm de Städter sick so wunnern dään: miene Kinner schnacken Plattdüütsch mitenanner, so as jümmer – ahne sick wat dorbi to denken.

Mit Platt kannst´ schienbor in de Grootstadt mal so önnich allens dörchenanner bringen. Dat dat so eenfach is, fremme Lüüe ut ehren Dämmerslaap to halen, har ick echt nich dacht! Probeiert dat doch ok mal ut!!