Höltern in de 50iger Johren

En Naver wöör ok dorbi. In de Wintertiet vun Dezember bet En´n Februor wöör de beste Tiet to´n Höltern. Morgens, wenn dat jüst hell würr, güng dat mit´n Fohrrad Richtung Wintemaur an de Chaussee bzw. Ehrhorn los.

De Streck up de Henfohrt weer teemlich fix to föhren. Denn de Weg an de Bahnstreek güng bet Barrl bargdaal. Denn föhren wi en poor Kilometer an de B3, kort vör den Bahnövergang bögen wi rechts af un föhren an de Iesenbahnlienen bet na den Jagen, wo wi us mit den Förster drepen wullen.

De Förster deel us enige Striepen vun den bedrapenen Jagen to. Nu kunnen wi mit Holtarbeiten anfangen. Jeder Boom, de ünner en annern stünn oder keen Spitz mehr harr kunn afhaut warrn, Bruchholt so un so. De mehrsten Bööm wöörn junge Dannen, de dünn un temlich snell wussen un afbracken wöörn. (Wind- oder Sneebrüch). Wi arbeiden na de olen Oort un Wies: Handsaag un Ext – Motoorsagen harrn wi nich.

So´n stille Arbeitssteed as in´ne Forst, heff ik ni wedder kennenlehrt. De Wind beweg männichmal de Spitzen - aver sünst? Bi koolt Frostweder güng de Arbeit op´t best vun de Hand. In de Posen geev dat Wustbrööd un Muckefuck ut de Thermoskannen. Bevör´t ganz düüster warrn de, maakten wi Fieravend un föhrten na Huus.

De Förster lööp bald jeden Dag dörch unsen Jagen un snack mit uns. De Holtstangen müssen up de Weeg an´n Jagen prick (exakt) stapelt warrn. Na´n poor Daag harrn wi´n Foder un mehr Holt tosamen.

De Förster kunn upmeten un denn dröffen wi dat Holt eerst afföhren. De Naver harr to de Tiet al en Trecker, Ritscher 20 PS, de Anhänger dorto wöör en Plattformwagen ahnen Kippvörrichtung. Aver ümmerhen keen Ackerwagen mehr. De Wagen würr goot belaadt, Ansteker un Keden sekern dat Föhr.

Faste Straten geev et nich, bet up dat korte Stück över de B3 bet Barrl. Af hier geev et blot Sandwege bet no use Hoffsteden. Dat Treckergespann föhr nu in de Ackerwagentraden öbern Höpen, in de ok al de Peer lopen harrn. Kommodige weer dat schon, denn ok wi könen mit up´n Trecker sitten.

Dat Holt ut de Forst würr deelt un jeder verarbeid et bi sik up´n Hoff. Enige Stangen würrn dörchsaagt un en Naver, enTimmermann, boe dorut en Lattentuun. Dat mehrste Holt hack en Maschien, de Buschhacker, to Füerholt. Dat Höltern in de Wintertiet würr noch enige Johr an ünnescheedliche Öörd maakt, wegen wi kenen Woold harrn. Jichtenswann geev et ne zentrale Hitttechnik, weg vun de enkelten Avens. Un wat kummt in de neegsten Johrn? Weller Höltern?