Gerd is nu up Rente

Man, du glöws nich, wat dat bedüt: In Hus is dat äin mittleret Erdbeben! Nix is mehr as vörher. De gesamte Organisation is uppen Kopp stellt! De Arbeitsplaon mutt näi indeelt weern. Well is nu wann de Chef? Well regeert den Husholt? Well haev dat Regiment inne Köke?

Gerd was ja bis vandaoge totaol in sinen Beruf inspannt. Dor was gor kine Tiet vör irgendwat in Hus. Man nu ligg vör üm ne ganze Riege van neeien Upgaobengebieten, wor man sück utprobeeiern kann. Well seg dann, dat he nich netsogaut inkopen künn un ok wall äin Middagäten klorkrieg? Sine Frau Leni süch schwore Tieten up sück taukaomen, as Gerd kunddö, dat he sück nu mehr inbrengen un ehr unnerstützen wull innen Husholt. Insgeheim müss se an den Film „Papa ante Portas“ denken. Gerd wull vandaoge maol dat Kaoken öwernähmen. Künn ja wall nich so schwor wän. „Sett du di man in´t Wohnzimmer“, segg he grottügig. „Du haes lange genoch den ganzen Husholt schmäten!“ Leni hörde van Tiet tau Tiet bedrohlichet Klappern ut den Köke, man se nahm sück vör, nich intaugriepen.

„Düwelnochmaol, wor steiht dann de Päper? Wat is dat dann vör ne komische Odder hier? Dor findt man ja gornix!“ schimpde he. Dor füllen all ´nen poor Gewürzdäeusen mit Schandaol up de Kökenfliesen. Leni versöchde immer noch ruhig tau blieben. „Hier wött ers maol ümrümt“, hörde se ehren Mann grummeln. Leni stellde den Fernseher lauter, man müss ja nich alles mithören.