Utstürven Berufe

Nu tau den Berufen, de et freuer hier sau gav: De einen Hoff harren, würn natürlich Buer. Dortau keimen Knecht un Maged. Twee Familien lievet vandage noch von der Landwirtschaft. Se hätet nu Landwirt und Knecht un Maged givt et nich mier. Einen Kopmann harren wie ok. Hei harre einen Kolonialwarenladen, do konn eine alles köpen. Vär Essig un Ölle namm man de Pulle miee und vär Semp dat Glas. Dat annere kamm in Papiertutens. Einen Schauster gav et ok. Hei flicke de Schaue, make ok ne niee Sahle ünner un verkoffte ok niee Schaue. Schaue vär Fruslüe, de Tracht anneharren, make hei sülmst. De Schnieder in usen Dörpe, was dovär bekannt, dat hei nich blos vär de Lüe nahen konne, de Stadttüch anneharren, sondern seck ok Buerntüch utkenne.

Da de Isenbahn dür use Dörp gaht, harren wie ok einen Schrankenwärter. Viele verdeinen ühr Geld bie de Iesenbahn. Wenn et heit, sei oarboat in Rotte, denn mößten sei de Schwellen stoppen. Vandage maket dat de Maschinen. Mi wurd vertellt, dat et ok einen Zigarrenmaker egieben hat. Einen Standesbeamten harren wie ok. Innen Dörpe wuhne ein Boameume (Hebamme), de de Kinner up de Welt hulp un den Fruslüen biestond. Ne Schaule harren wie ok, un dortau gehüre de Schaulmester. Hei ünnerrichte nich blos de Kinner, hei was ok noch Organist und spiele jeden Sönndag de Orgel inner Kerken. Einen Stellmaker und Drechsler gav et tau miener Kinnertied ok noch. Wat hei make, was üsch Kinnern egal.

Wichtig vär üsch was, dat hei schöne Brummkreisel make, mit denen wie denn uper Straate spielen. Eine Poststiee gav et ok. Breiwe un Pakete würn innt Hus ebrocht und am iersten van jeden Monat konnen seck de Rentner do ühre Rente afhalen. Tau´n telefonieren moßten wie na de Post, denn do was all ein Telefon. Inner Gaststiee dreip seck eis inner Wieken de Gesangverein taun Singen üben. Viele annere drünken ühr Fieerabendbeier bie der Wirtsfrue, de in Stadt un Land bekannt was. De Bäcker verkoffte sien Brot nich blos innen Laden, sondern feuere mit sienen Brotauto bie allen vär de Dür. Jeder innen Dörpe harre ein Schlachteschwien innen Stalle. Sau vär Wiehnachten moßte dat Schwien dran glöben. Denn kam de Husschlächter, de innen Sommer Mürker was, un schlachte dat Schwien un make de Wost.