Amtlicket Schrieben

So ein grauen Breiw kummp uck vör Wäken bi Otto an. Uppe A1, kort vör Münster, häbbt sei üm uppe Fohrt in ‘n Urlaub blitzt. Dat is argelik un nu all twee Monate her.

Jungedi! 80 km/h un 120 km/h stünd dor up ‘t Papier. Fotografiert wassen hei un uck sien Menske.

„Dissen blöden Fraogebogen füll ick nich ut. Do staiht: Zutreffendes ankreuzen! Beigefügte Kopie mit Stellungnahme bitte zurück. Dat daue ick nich. Up dat Bild kiek ick mit Sünnenbrill uppe Näsen jao jüss bisiete. Aower mien Menske is dor ganz dütlick uppe. Nee! Betaohlen dau ick dat nich un trüggeschriewen wisse nich. Dat teuwe ick einfach aff. Utsitten! Basta!“

Nao sess Wäken kummp dei tweite Fraogebogen in ‘t Huus, well dat Auto stüert häff. Do schriff Otto up den Fraogebogen: „Das Foto zeigt meine Ehefrau. Ich bitte, das Strafmaß zu mindern, weil sie in der Pflege arbeitet und unterbezahlt zum Wohl der Alten tätig ist. Letzthin wird das Geld aus meiner Tasche genommen werden müssen. Hochachtungsvoll Otto B.“

Een Monat läöter pingelt dat anne Huusdörn. Dei lüttke Sven is vandaoge bi Oma un Opa. Hei spält mit Autos in ‘Flur. Stantepee maokt hei dei Dörn aopen. Dei Kerl mit Aktentaschke fraogt nao Otto. „Opa is nich in Huuse, aower Oma is inne Käöken.“

Dei Kerl wiest Oma dei Ünnerlaogen mit dat Foto uppe A1. Oma dait so, dat sei den Kerl an ‘t Stüer mit Sünnenbrill‘ nich kennen dait.

„Dann is jao nicks tau maoken, wenn Otto nich dor is, un du kanns dortau jao nicks vertellen.“

Nen lüttken Oogenblick schnackt sei noch tauhoope, un dei Amtsperson will gaohn. At hei in Flur nao dei Huusdörn taugaiht, löpp dei lüttke Sven achter üm her un sägg ganz stolt: „Ick weit, well dor achter dat Stüer sitt.“

Do mott dei Amtsperson schmüsterlachen un ment: „Verseiht jau nich. Lüttke Pötte häbbt mangers grote Ohrn!“ Un maokt drocke dei Huusdörn achter sick tau.