Tradischion un Tookunft

Noch vör de Coronatied hett de „Club Geselligkeit“ in Beck´d (Bleckede) sien Jubiläum to hunnert Joahren Bestahn fieert - un Angela Pabst, Ortsvörsteherin von Ra‘gast (Radegast) hett de Laudatio holl´n, de hier in Uttügen to läsen is: „Siet 1920 ünnehöld düsse Club nu Bleck‘d mit Traditionspläch, Geselligkeit in Gemeinschaft un de plattdütsche Spraak. Motto is ‚An dat gaude Oole de Treue holen un an dat schöne Neie sick gern erfreu‘n‘.

Wenn ich dran denk, wat sick alleen in de letzen fief Johrteinten so all‘n verändert hätt: In de 50er und 60er Johrn wör dat Laben noch so richtig echt un binah een lüttes Wunner, dat wü as Kinner dat dormals so överläfft häbbt!

Haar man as Kind een Fohrrad, wör dat etweder too lütt, or too grood. Oohn Gangschaltung – un Helm häbbt wü ook nicht bruukt. Wenn de Reifen platt west is, mössen wü dan sülbens reparieren. Uns Tüch häbbt wü meistens von de Geschwister updragen, denn wör dat ook nich so leech, wenn wü uns an Dach wedder schieddich maakt haar‘n.