Aufbruchstimmung

Seit ich denken kann – oder genauer g’sagt: seit ich auf’n Bock geh – hab i immer zwoa kloane Plastiksackerl in meim Rucksack. Oans für d’Hinterlassenschaften von meim Hund, und des andere für’n Rehaufbruch. Da hab i etliche Adressen von Feinschmeckern, die sich jedes Mal g’frein, wenn i auf d’Nacht bei eana läut und die Innereien vorbeibring.

Die Lisbeth, die Frau vom Ranzinger, die Erna, dem Krautschneider-Sepp seine, und die Hundsdorfer Emmi ham des immer sehr dankbar angenommen und ham si mit am Schnapserl vor der Haustür, mit da Quittenmarmelad oder mit selbstg’machtn Leckerl zu Weihnachten revanchiert. I war immer drauf bedacht, meine Aufbrüche gerecht unter den Damen zu verteilen, damit si ja koane vernachlässigt fühlt. Alles hat immer passt – aber jetzt is kumman, wia scheinbar überall, a Zeitenwende.

Die Veranstaltungen in unserm Gemeindehaus san immer gut besucht. Amoi spielt d’Feuerwehr, a andermoi tritt a Zauberer auf, d’Grundschülerinnen geb’n a Kostprobe ihrer Ballettkünste oder da Pfarrer zeigt Dias von seiner Reise noch Jerusalem. Aber die letzte Veranstaltung hätt’s echt ned braucht! I war zwar ned dabei, aber was i ghört hab, muss des a besonders deppertes Kasperltheater g’wesen sei. Nein – koa Kasperl mit roter Mütze, dem die Zuhörerinnen vom Frauenbund an de Lippen g’hängt san, sondern a Beraterin – genauer gsagt: a Ernährungsberaterin. Über d’wohltuende Wirkung von Brennnesseln, Löwenzahn, Taubnessel und Spitzwegerich hat’s g’redt. Und dann, mit erhobenem Zeigefinger, besonders drauf hingewiesen, dass ned ois, was d’Natur hervorbringt oder was ma vom Wald mit hoam bringt, a wirklich gsund is. Ja sogar schädlich könnt’s sei! Sie hat da ned von giftigen oder radioaktiv strahlenden Schwammerl g’redt, sondern – und jetzt pass auf – von Schwermetallen und Quecksilber, die besonders reichlich in da Leber vom Reh angereichert sei’n. A Rehleber, so die Quacksalberin, sollt ma allerhöchstens, wenn’s wirklich unbedingt nötig is, höchstens amoi im Monat – oder besser glei gar ned – essen. Sauber hab’n’s mi neulich abblitzen lassen, die Lisbeth, die Erna und die Hundsdorferin, wie i mit da Leber von Haus zu Haus gangen bin. Weggschmissen hab i’s – zamm mit’m Hundekacksackerl – in d’Tonne g’klopft.